សង្ស័យស្រវឹងទេដឹង? បើក LEXUS 470 បុករះរថយន្តស៊េរីទំនើប៥គ្រឿង និងរ៉ឺម៉ក បណ្តាលឱ្យរងការខូចខាតយ៉ាងដំណុំ

(ភ្នំពេញ)៖ បុរសម្នាក់សង្ស័យស្រវឹងបានបើករថយន្ត LEXUS​ LX470​ យ៉ាងលឿនដូចហោះទៅបុករះរថយន្ដ ៥គ្រឿង​ ,រុឺម៉កមួយគ្រឿង និងរទេះដឹកផ្លែឈើមួយគ្រឿងបណ្ដាលឲ្យរងការខូចខាត និងធ្វេីឲ្យមនុស្ស៤នាក់រងរបួសធ្ងន់ស្រាល ត្រូវបានរថយន្ដសង្គ្រោះបន្ទាន់ដឹកបញ្ជូនទៅមន្ទីពេទ្យភ្លាមៗ។

ហេតុការណ៍គ្រោះថ្នាក់ចរាចរណ៍ដ៌រន្ធត់នេះបានកើតឡើងនៅវេលាម៉ោង១៣និង១៥នាទី នារសៀលថ្ងៃពុធ ទី២៧ ខែវិច្ឆិកា ឆ្នាំ២០២៤ ស្ថិតនៅតាមបណ្តោយផ្លូវ១៨២ (ជិតស្ដុបទេពផន) ភូមិ៤ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។

តាមសាក្សីនៅកន្លែងកើតហេតុបានឲ្យដឹងថា មុនកើតហេតុគេឃើញបុរសវ័យចំណាស់ម្នាក់បានបើករថយន្តបង្កម៉ាកឡិចសុីស LX470 ពណ៌ខ្មៅពាក់ផ្លាកលេខស្វាយរៀង 2A. 0788 សង្ស័យស្រវឹងបើកបរតាមបណ្ដោយផ្លូវ១៨២​ ទិសដៅពីកើតទៅលិចក្នុងល្បឿនលឿន ខណៈដល់ផ្លូវបំបែកជាបួនកែងនិងផ្លូវ២៣៧ ក៏បុកម៉ូតូវ៉េវ ឲ្យដួល​ ហេីយបន្តបុករ៉ីម៉ក១គ្រឿង និងបន្ដបុករះរថយន្តក្នុងឃ្លាំងដែលម្ចាស់កំពុងតែដាក់តាំងលក់ក្នុងហាងបណ្តាលឱ្យរងការខូចខាតអស់ចំនួន ៥គ្រឿង រទេះ១គ្រឿង និងមនុស្សរងរបួសធ្ងន់ស្រាល៤នាក់ ចំណែកអ្នកបើកបររថយន្ដរងរបួសធ្ងន់ ភ្លាមនោះជនរងគ្រោះត្រូវបានបញ្ជូនទៅសង្រ្គោះនៅឯមន្ទីរពេទ្យលោកសង្ឃដោយឡែករថយន្ដបង្ករងការខូចខាតយ៉ាងដំណុំ។

ក្រោយកើតហេតុសមត្ថកិច្ចមូលដ្ឋានសហការជាមួយកម្លាំងជំនាញនគរបាលចរាចរណ៍ខណ្ឌទួលគោកនិងកម្លាំងជំនាញការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ បានចុះមកពិនិត្យកាំមេរ៉ាសុវត្ថិភាពធ្វើការវាស់វែងនិងស្ទូចយករថយន្តបង្កយកទៅរក្សាទុកដើម្បីរង់ចាំដោះស្រាយតាមផ្លូវច្បាប់នៅពេលក្រោយ៕