លោក ថេង សុថុល អញ្ជើញសួរសុខទុក្ខនិងចែកអំណោយមនុស្សធម៌ដល់ប្រជាលរដ្ឋជីវភាពខ្វះខាតចំនួន ៦០គ្រួសារ

(ភ្នំពេញ)៖នាព្រឹកថ្ងៃព្រហស្បតិ៍ ទី២៤ ខែតុលា ឆ្នាំ២០២៤ នៅបរិវេណវត្តមង្គលវ័ន ក្រុមការងារអនុសាខាកាកបាទក្រហមកម្ពុជា​ ខណ្ឌ៧មករា ដឹកនាំដោយលោក ថេង សុថុល ប្រធានកិត្តិយសអនុសាខា បានចុះសាកសួរសុខទុក្ខ និងចែកអំណោយមនុស្សធម៌ជូនដល់ចាស់ជរាគ្មានទីពឹង ប្រជាពលរដ្ឋដែលមានជីវភាពខ្វះខាត សរុបចំនួន៦០គ្រួសារ ក្នុងនោះមកពីសង្កាត់មនោរម្យចំនួន ១០គ្រួសារ សង្កាត់អូរឫស្សីទី១ ចំនួន ២៣គ្រួសារ និងសង្កាត់អូរឬស្សីទី២ ចំនួន ២៧គ្រួសារ។

នាឱកាសនោះ​ លោក ថេង សុថុល  បានលេីកឡេីងពីការយកចិត្តទុកដាក់គិតគូពីឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា​ រាជធានីភ្នំពេញ​ និងជាពិសេសការយកចិត្តទុកដាក់គិតគូខ្ពស់ជាប់ជានិច្ចពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា​ ចំពោះសុខទុក្ខប្រជាពលរដ្ឋយេីងទូទាំងព្រះរាជាណាចក្រកម្ពុជា​ ជាពិសេសជនរងគ្រោះ​ និងងាយរងគ្រោះគ្រប់ប្រភេទ​ ដោយមិនទុកឱ្យប្រជាពលរដ្ឋណាម្នាក់ស្លាប់ដោយយេីងមិនបានដឹង​ ហេីយមិនបានដោះស្រាយ​នោះឡេីយ​ ពោល “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល“។​ លោកបានលេីកឡេីងថា៖​ ទីណាមានការលំបាក ទីនោះមានកាកបាទក្រហមកម្ពុជា​ ជាក់ស្តែងដូចជាពេលនេះ​ គឺការជួយរបស់កាកបាទក្រហមកម្ពុជា​ ដោយមិនប្រកាន់ពីនិន្នាការនយោបាយ​ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់។ ជាមួយគ្នានេះដែរ លោកប្រធានកិត្តិយសអនុសាខា​ ក៏សូមអំពាវនាវដល់បងប្អូនប្រជាពលរដ្ឋទាំងអស់​ យកចិត្តទុកដាក់ពីសុខភាពអនាម័យក្នុងការរស់នៅ​ និងការហូបចុក​ ដើម្បីចៀសវាងពីជំងឺដង្កាត់ផ្សេងៗមកបៀតបៀន។ 

អំណោយមនុស្សធម៌ដែលផ្តល់ជូនក្នុង១គ្រួសារៗរួមមាន៖ អង្ករ២០គីឡូក្រាម ឃីត១កញ្ចប់ មី១កេស ទឹកសុទ្ធ១កេស ទឹកត្រីឬទឹកស៊ីអ៉ីវ១យួរ និងថវិកាចំនួន២ម៉ឺនរៀល៕