ឯកឧត្តម នូ សាខន និងឯកឧត្តម គួច ចំរើន ចូលរួមរំលែកទុក្ខគ្រួសារសព សេក បូរិ ភេទប្រុស អាយុ១៩ឆ្នាំ លង់ទឹកស្លាប់

(ខេត្តកណ្តាល)៖ នាព្រឹកថ្ងៃទី២៣ ខែកក្កដា ឆ្នាំ២០២៤ ឯកឧត្តម នូ សាខន ប្រធានក្រុមប្រឹក្សាខេត្តកណ្តាល និងឯកឧត្តម គួច ចំរើន អភិបាល នៃ គណៈអភិបាលខេត្តកណ្ដាល ដោយមានការអញ្ជើញចូលរួមពីមន្ទីរអង្គភាពជុំវិញខេត្ត កងកម្លាំងទាំងបី និងអាជ្ញាធរស្រុកកណ្ដាលស្ទឹង បានអញ្ជើញចូលរួមរំលែកទុក្ខគ្រួសារសព សេក បូរិ ភេទប្រុស អាយុ១៩ឆ្នាំ នៅភូមិអំពៅព្រៃ ទំនប់៩៤ ដែលបានលង់ទឹកស្លាប់ ហើយសាកសពរកឃើញនៅយប់ម៉ោង៩ ថ្ងៃទី២២ ខែកក្កដា ឆ្នាំ២០២៤។ 

ស្ថិតក្នុងឱកាសប្រកបដោយសមានទុក្ខដ៏សែនក្រៀមក្រំបំផុត ឯកឧត្តម ប្រធានក្រុមប្រឹក្សាខេត្តកណ្តាល និងឯកឧត្តម អភិបាលខេត្តកណ្តាល សូមចូលរួមរំលែកនូវមរណទុក្ខដោយក្តីអាណិតអាសូរ និងស្រណោះអាឡោះអាល័យជាទីបំផុតជាមួយគ្រួសារសពដែលបានបាត់បង់កូនជាទីស្រឡាញ់ ក្នុងហេតុការណ៍លង់ទឹកនេះ។

ជាមួយគ្នានេះដែរឯកឧត្តមក៏បាននាំយកនូវថវិកាមួយចំនួនចូលរួមរំលែកទុក្ខជូនដល់គ្រួសារសពផងដែរ។